Біз табиғаттың  бір сыйына барынша назар аударып, оны сақтай білуіміз қажет. Сондықтан Биологиялық әралуандықты қорғау қорын құру керек деп санаймын. Мен Мемлекет басшысы ретінде бұл ауқымды жұмыстың маңызы орасан зор екенін көрсету үшін осы қоғамдық ұйымға өзім жетекшілік етуге дайынмын.

✨Қаратау таулары өзінің ерекше ландшафттарымен, экожүйесінің алуантүрлілігімен ерекшеленеді. Баршамызға белгілі биологиялық алуантүрлілік қазіргі және келешек ұрпақ үшін үлкен құндылық болып табылатын жаһандық мұра, жабайы флора мен фауна өкілдерінің саны адам әрекетінің нәтижесінде тез қарқынмен азаюды жалғастыруда. 

Болашақта жануарлар мен өсімдіктердің жойылып кету қаупін болдырмау үшін табиғат қорғау ұйымының қызметкерлері, биологтар мен экологтар ретінде біздің міндетіміз – өңіріміздің және жалпы еліміздің биологиялық әртүрлілігін сақтауға бар күш жігерімізді салу.

Биологиялық алуантүрлілікті сақтаудың кез келген  әдістемесі қанша түр бар екенін, оның ішінде сирек кездесетін және жойылып бара жатқан түрлерді, олардың қалай таралатынын, олардың өмір сүру салтын, табиғаттағы экологиялық және биологиялық маңызын нақты зерттеуді және білуді талап етеді. Демек, Қаратау қорығының негізгі міндеттерінің бірі – өлкеміздің флорасы мен фаунасының байлығын зерттеу, қалпына келтіру және сақтау. Айта кету керек, биологиялық алуантүрлілікте рекреациялық ресурс болып табылады. Сондықтан Қаратау қорығы қызметінің бір бағыты – экологиялық туризмді дамыту. 

Қаратау арқары - қорықтың басты байлығы, қаратау тауларының эндемигі, оның санын сақтау және қалпына келтіру үшін қорық құрылды. Арқар популяциясын және қорықтың экожүйелерін тұтастай сақтау, табиғи нысандардың табиғи қалпына келуіне ықпал ету аумақта күзету және қорық режимін сақтау арқасында қол жеткізіліп отыр. Енді біз Қаратау арқарының популяциясы сақталғанын, оның саны 30 еседен астам өскенін және бұл түр астының Қазақстанның жануарлар әлемінің генофондында лайықты орын алатынын мақтанышпен айта аламыз.